Social freezing
Mein Bekannde, de Kall, hat neulisch mitkrieht, was „social freezing“ is. Also, was es da jetz fer Methode gebbe tut, um Kinner ze krieje, oder grad aach net, sonnern späder, wanns de Leud vielleischd besser in de Kram basst.
Da wern Eier vonnere Fraa entnomme, sache mer ma, Stücker 25, des reischd dann normaler Weis späder fer zwaa Kinner, un die, also die Eier, wern dann uf ein Schlaach uf Minus 196 Grad abgekühlt. „Rapid freezing“, schockgefrostet, wie mer des nennt.
Isch unnerhalt misch als ema gern mit meim Bekannde. Wann der e neu Thema uffgeschnappt hat, dann hat er aach e eischene Meinung dezu. Aber diesma hab isch misch doch e bissi gewunnert. Fer des Thema mit dem social freezing müsst er sisch im Grund net persönlisch interessiern. Er hat ja mit sei Fraa e ganz Reih eischene Kinner krieht, sozusaache „in the old way“.
Aber de Kall war doch einischermaaße engagiert bei dem Thema. Waaßte, saacht er zu mir, waaßte, ersd hab isch bloß gedacht, dess die ganze Fraue doch spinne, die sowas mache. Un die Amis bei apple und facebook sowieso. Die wolle ihrene Mitarbeiderinne des egg-freezing sogar bezahle. Aber dann hab isch in soner Illustrierde drüber gelese. Un gemerkt, dess des Ganze eischendlisch ausm ganz annere Grund erfunne worn is un manschma werrklisch e gut Möglischkeid is, um en Problem ze löse.
Da war zum Beispiel ma e Fraa, die musst, Anfang dreißisch, wesche ner Krebserkrankung e Schemotherapie mache. Un Schemo heißd, dess de net weißd, was in dir all kaputt geht. Un da hat se vorher schnell en Satz Eier einfriern lasse – in der Hoffnung, dess se ersdens mit dem Krebs ferdisch wird un zweitens hinnerher, wann se wieder gesund is, sisch die Tiefkühleier befruchtet wieder einsetze lasse könnd. Des is doch genial, erschendwie. Oder? Un dann hat da gestanne, dess in Deutschland die meisde Fäll von social freezing aus genau dene medizinische Gründ gemacht wern.
Aber, saach isch zum Kall, aber des, wo die amerikanische Firme mache, des is doch werklisch grenzwertisch! Un da habbe aach gleisch bei uns die ganze Bischöfe un die Ethikkommission un isch waaß net wer alles gesche protestiert.
Ja schon, saacht de Kall. Aber warts ema ab. Ersd ham sisch damals in de seschzischer Jahrn all uffgerescht, dess mer e Pill erfunne hat, um sozusaache mit künstlischer Hilfe kaa Kinner ze krieje. Un jetz kann mer mit künstlischer Hilfe Kinner krieje. Da waaß isch ja net, welsche Uffreschung mir lieber is.
Am End aber, werste sehn, da leschd sisch die aane wie die annere Uffreschung.
