Mein Bekannde, de Kall, will die Flensburger „Sünderkartei“ erhalde
Mein Bekannde, de Kall isses schon bald leid ze hörn, was all neu is im Neue Jahr. Dadevon is ja jetz werklisch iwwerall die Red. Zum Beispiel: dess de nix mehr zahle musst, wann de bein Dokter gehst, die sogenannt Praxisgebühr werd abgeschafft. Gut so! Oder neu is aach de neue Labbe, der sogenannt EU-Führerschein. Was der soll, fraacht mer sisch allerdings. Weil, der hält dann nur noch fuffzehn Jahr. Was soll dann des? De Karl hat sein Führerschein seit fast fuffzisch Jahr un der duts aach nach zwaa Ma Waschmaschin immer noch.
Apropo Audofahrn. Die berühmd Flensborjer Verkehrsünderkartei, die werd jetz aach – naa net glei abgeschafft. Aber neu werd se schon gemacht. Ab demnächst haaßt se net mehr Verkehrssünnerkartei un aach net „Verkehrszentralregister“, was de eischendlische, offizielle Name devon is. Ab jetz haaßt die Sach „Fahreignungsregister“ Du lieber Himmel, was fer e gestelzt Wort fer so e aafach Sach!
Jetz könnt mer denke, dess es ja aach egal is, wie sisch des Amt nenne dut. Aber eischendlisch, denkt de Karl, eischendlisch isses doch schad, dess es bald kaa Verkehrsünnerkartei mehr gebbe soll. Immerhin hat uf die Weis schIießlisch doch jeder Simbel mitkrieht, was e Sünd iwwerhaubt is. Nämlisch aafach e Sach, wo mer verkehrt gemacht hat. Bei Rot übber die Ambel oder ema mit seschzisch dorsch die Tempo-dreißisch-Zon gebreddert – schon haste Punkte un warst – ebe – en Verkehrssünner. Hast hald die Reschele net aagehalde. Hast anner Leud gefährlisch gefährdet. Des derf mer net, des is e Sünd!
Gud – dene Theoloche reischd des vielleischt noch net aus als Beschreibung. Aberm Kall schon. E Sünd is, wann mer was macht, was, saache mer ma, in de zehn Geboode unnersaacht werd. Mer kennts ja: sollst net klaue, net lüüsche, derfst annern net tot mache un so weider. Dem Karl scheints schon gut ze sein, dess die Mensche des Wort Sünde kenne dun. Aafach, weil so e schlischt Wort die Grenz markiert zwische Rischtisch un Falsch, zwische Gut und Bös. Un dess mer selber gucke muss, uf welsche Seid von de Grenz mer sisch bewescht. Is vielleischt doch schad, denkt de Kall, dass es bald kaa Verkehrssünnerkartei mer gebbe wird.
