Mein Bekannde, de Kall, freut sisch schon uff die Buchmess
Mein Bekannde, de Kall, hat jetz mehr Zeit als wie frieher. A ja: Er is jetz ja Rendner. Un weil er net mehr schaffe gehe muss, nimmt er sisch als ema was Besonneres vor. Neulisch isser zum Beispiel midde in de Woch, wo er sonst im Büro gehockt hat, ma widder in de Taunus. Un is ma e paar Kilomeder dorsch de Wald gelaafe. Wie hat er des genosse! In der Woch jetz geht fern Kall die Sach klar: er geht uff die Buchmess. Heud werd se fer die wischtische Leud schon eröffent, also fer die Buchhändler un Autorn un die Reporter. Aber dann am Woche-End, da derf mein Bekannde un seinesgleische dann aach enei. In de Zeitung hat jetz gestanne, dess dies Jahr allaans fer Kinner- und Juchendbüscher eintausend un fünfhunnert Verlaache uff de Mess sin! Des solld mer doch net fer möschlisch halde! Dadebei hadde doch all die berufsmäßische Pessimiste schon vor Jahrn devon gesproche, dass die Kinner net mehr lese könnte und aach net mehr lese wollde. Un dess se all nur noch am Combjuder hocke täte un ‚world of warcraft‘ oder sowas spiele täte! Ja denksde! Die lese all wieder (naja: die meiste jedenfalls)! Net nur Imehls, sonnern aach Heftscher un dicke Büscher.
Fern Kall is e Buch an sisch was Besonneres. Er duht sisch zum Beispiel forschbar schwer, e Buch wegzeschmeiße. Dabei sin mansche von saane aale Daschebüscher so vergammelt, dess mer sisch fraachd, ob se vielleischt sogar fers Riseigling zu schlääscht sin. Aber ma im Ernst. Des is schon e Problem, wann mer als noch e Buch un noch aans kaaft oder zum Gebordsdaach geschenkt krieht. Wohin demit? Des Regal is doch längst voll bis unner die Deck! Es soll ja Leud gebbe, wo immer, wann se e neu Buch krieje, sisch von em alde trenne. Als de Kall des ma fer sisch iwwerlescht hat, da hat er schon gemerkt, dess es unner seine Büscher sone un solsche gibt. Also die, wo er – wann er ehrlisch is – seit Jahrzehnde net mehr in die Hand genomme hat. Des sin meistens welsche, wo sozusaache ihrm eischene Klabbetext net gewachse warn. Un dann gibt’s die annere, wo er ums Verrecke net hergebe würd. Des sin komischer Weis grad die ältere, wo er in ganz bestimmte Situatione gelese hat, wo in seim Lebe wischtisch warn. Oder wo er von bestimmte Mensche krieht hat, wo fern Kall e besonnere Bedeutung hatte. Zum Beispiel sei leddergebundene Bibel, wo ihm sein Opa zur Konfirmation geschenkt hat.
Erschendwie geht’s aam mit de Büscher wie mit de Leud, denkt sisch mein Bekannde: mer macht e Meng Bekanndschafde, hat aber bloß wenisch rischdische Freunde un die sin eim dann umso wischtischer. Mit dene is mer gern zesamme, von dene lässt mer sisch was saache, die fehle eim, wann mer se net bei sisch hat.
